media

ഞങ്ങള്‍ സത്യങ്ങള്‍!
വിശ്വസിക്കപ്പെടാന്‍ വിധിക്കപ്പെട്ടവര്‍,
വളച്ചൊടിച്ചാലും നോവാത്തവര്‍,
വഴിയോരത്ത് തെണ്ടേണ്ടി വരുന്നവര്‍,
പരാതികളില്ലാത്തവര്‍, പീഡിതര്‍!

ഞങ്ങള്‍ സത്യങ്ങള്‍!
നിങ്ങളുടെ വായിലെ കളിക്കോപ്പുകള്‍,
ചൂടേറിയ ചര്‍ച്ചയിലെ ബലിയാടുകള്‍,
പരസ്പരബന്ധമില്ലാത്ത നേരമ്പോക്കുകള്‍,
വിവേകത്തെ കീഴ്പ്പെടുത്തുന്ന വൈറസുകള്‍.

ഞങ്ങള്‍ സത്യങ്ങള്‍!
പല പേരില്‍ അറിയപ്പെടുന്നവര്‍,
നിങ്ങള്‍ക്കിഷ്ടമുള്ള രൂപം ധരിക്കുന്നവര്‍,
സ്വന്തം മേല്‍വിലാസം നഷ്ടപ്പെട്ടവര്‍,
അഭിപ്രായസ്വാതന്ത്ര്യമില്ലാത്തവര്‍.

ഞങ്ങള്‍ സത്യങ്ങള്‍!
ടി ആര്‍ പി റേറ്റിംഗ് കൂട്ടുന്നവര്‍,
തകര്‍ന്നു കഴിഞ്ഞും ‘ബ്രേക്കിംഗ്’ ആവാന്‍ വിധിക്കപ്പെട്ടവര്‍,
ആത്മാവില്ലാതെ ടിവിയിലും പത്രത്തിലും മരിച്ചുവീണവര്‍,
നിങ്ങളുടെ സന്തതികള്‍!

ഞങ്ങള്‍ സത്യങ്ങള്‍!
ഞങ്ങളല്ലാതായവര്‍,
വഴിപിഴച്ചുപോയവര്‍,
വില്‍പ്പനച്ചരക്കുകള്‍!

ഞങ്ങള്‍ക്ക് നുണകളോട് അസൂയയാണ്
അവരൊക്കെ എത്ര ഭാഗ്യം ചെയ്തവര്‍!

Advertisements